அறிவோம் அழகுத் தமிழ் வார்த்தை - முரஞ்சுதல்

ஓவியம் : இணையம்

'அறிவோம் அழகுத் தமிழ் வார்த்தை' –  முரஞ்சுதல்

வார்த்தை :  முரஞ்சுதல்

பொருள்

·         மூப்பு

·         முதிர்தல்

·         முற்றுதல்.

·         வலிபெறுதல்

·         நிரம்புதல்

குறிப்பு உதவி / இலக்கிய பயன்பாடு

1.

சுரும்பொடு தேனும், வண்டும்,

     அன்னமும், துவன்றி; புள்ளும்,

கரும்பொடு செந் நெல் காடும்,

      கமல வாவிகளும், மல்கி;

பெரும் புனல் மருதம் சூழ்ந்த

      கிடக்கை பின் கிடைக்கச் சென்றார்;

குரும்பை நீர் *முரஞ்சும்* சோலைக்

      குலிந்தமும், புறத்துக் கொண்டார்.

கம்பராமாயணம்

பொன்வண்டு, தேன்வண்டு, கருவண்டு என்னும் பலவகையான வண்டுகளும் அன்னப் பறவைகளும் நெருங்கி  நாரை முதலான ஏனைய பறவைகளும் கரும்புகளும் செந்நெற் பயிர்களும் தாமரைத் தடாகங்களும் நிறைந்து; மிக்க நீர்வளங் கொண்டமருதநிலம் சூழ்ந்துள்ள  இடங்கள் தம் பின்னால் கிடக்கும்படி அப்பால் கடந்து சென்றனர் அந்த வானரவீரர்கள்; இளநீர்க் காய்கள்; நிரம்பிய தென்னஞ்சோலைகளையுடைய குலிந்த நாட்டையும்;  (தமது) பின்புறத்ததாகும்படி முன்னேறிச் சென்றார்கள்.