அறிவோம் அழகுத் தமிழ் வார்த்தை - சாரிகை

ஓவியம் : இணையம்

'அறிவோம் அழகுத் தமிழ் வார்த்தை' –  சாரிகை

வார்த்தை :  சாரிகை

பொருள்

·         வட்டமாக ஓடுதல்

·         ஒருவகையான சுழல்காற்று

·         மைனா போன்ற ஒருவகைக் குருவி

·         சுங்கம்

·         கவசம்

·         போர்க்கவசம்

குறிப்பு உதவி / இலக்கிய பயன்பாடு

1.

சென்றவர் தடுத்த போதில்

   இயற்பகை யார்முன் சீறி

வன்றுணை வாளே யாகச்

   *சாரிகை* மாறி வந்து

துன்றினர் தோளுந் தாளுந்

    தலைகளுந் துணித்து வீழ்த்து

வென்றடு புலியே றென்ன

   அமர்விளை யாட்டின் மிக்கார்

பெரிய புராணம் - சேக்கிழார்

உறவினர்கள் அம்மறையவரைத் தடுத்தபோது அதைக் கண்ட இயற்பகை நாயனார், அவர் முன் வெகுண்டு தமக்கு வலிய துணையான வாள்படையைக் கொண்டு, வலம் இடமாகச் சுற்றிவந்து, தம்மோடு எதிர்த்தவர்களின் தோள்களையும், கால்களையும், தலைகளையும் வெட்டி வீழ்த்தி, ஏனைய மிருகங்களை வென்று கொல்லும் ஆண்புலி போலப் போர்த் தொழில் செய்து வெற்றி பெற்றவராக விளங்கினார்.