அறிவோம் அழகுத் தமிழ் வார்த்தை - தோதகம்

ஓவியம் : இணையம்

'அறிவோம் அழகுத் தமிழ் வார்த்தை' –  தோதகம்

வார்த்தை :  தோதகம்

பொருள்

·         வருத்தம்

·         வஞ்சகம்

·         சாலவித்தை

·         கற்பொழுக்கமின்மை

குறிப்பு உதவி / இலக்கிய பயன்பாடு

1.

தெள்ளிய ஏனலில் கிள்ளையைக் கள்ளச் சிறுமி எனும்

வள்ளியை வேட்டவன் தாள் வேட்டிலை சிறுவள்ளை தள்ளித்

துள்ளிய கெண்டையைத் தொண்டையைத் *தோதகச்* சொல்லை நல்ல

வெள்ளிய நித்தில வித்தார மூரலை வேட்ட நெஞ்சே.

கந்தர் அலங்காரம்

தெளிவான தினைப்புனத்தில் உள்ள கிளியை ஒத்தவரும் உள்ளத்தைக் கவரும் இளங்குமரியுமான வள்ளியம்மையை விரும்பிய திருமுருகப்பெருமானின் திருவடிகளை நீ விரும்பவில்லை; ஆயினும் சிறிய வள்ளைக் கொடியைத் தள்ளிவிட்டு ஆற்றில் துள்ளித் திரிகின்ற கெண்டைமீன் போன்ற பெண்களின் கண்களையும், கோவைக் கனியொத்த சிவந்த இதழ்களையும், மயக்கும் வஞ்சக வார்த்தையையும், வெண்மையான முத்துப் போன்ற ஒளிவீசும் பற்களுடன் கூடிய புன்சிரிப்பையும் விரும்புகின்றாயே மனமே!.