அறிவோம் அழகுத் தமிழ் வார்த்தை - ஒல்குதல்

புகைப்படம் :  Bhavia Velayuthan

'அறிவோம் அழகுத் தமிழ் வார்த்தை' – ஒல்குதல்

வார்த்தை : ஒல்குதல்

பொருள் :
• தளர்தல்
• மெலிதல்
• குழைதல்
• நுடங்குதல்
• சுருங்குதல்
• அசைதல்
• ஒதுங்குதல்
• அடங்குதல்
• வளைதல்
• குறைதல்
• வறுமைப்படுதல்
• மேலேபடுதல்
• மனமடங்குதல்
• கெடுதல்
• நாணுதல்
• எதிர்கொள்ளுதல்

குறிப்பு உதவி / இலக்கிய பயன்பாடு

1.
ஒழுக்கத்தின் *ஒல்கார்* உரவோர் இழுக்கத்தின்
ஏதம் படுபாக் கறிந்து. - 136

ஒழுக்கம் தவறி நடத்தலால் வரும் கேட்டினை அறிந்து ஒருபோதும் ஒழுக்கத்தினின்று விலகாதிருப்பது உள்ளத்தில் ஊக்கமுடையவர்களின் பண்பாகும்.

2.
விண் பிளந்து *ஒல்க* ஆர்க்கும் வானரர் வீக்கம் கண்டான்;
மண் பிளந்து அழுந்த ஆடும் கவந்தத்தின் வருக்கம் கண்டான்;
கண் பிளந்து அகல நோக்கும் வானவர் களிப்பும் கண்டான்;
புண் பிளந்தனைய நெஞ்சன் கோபுரத்து இழிந்து போந்தான்.

கம்பராமாயணம்

வானுலகம் பிளந்து அசையுமாறு ஆரவாரிக்கும் வானர வீரர்களின் பெருக்கத்தைப் பார்த்தான்; ஆடுகின்ற தலையற்ற உடல்களின் கூட்டத்தைப் பார்த்தான்; கண்களை அகலமாகத் திறந்து போர்க்களத்தைப் பார்க்கும் தேவர்களின் மகிழ்ச்சியையும் பார்த்தான்; உடலிலுள்ள புண் பிளந்தது போன்ற துன்பமிக்க உள்ளமுடைய இராவணன்; கோபுரத்திலிருந்து இறங்கி வந்தான்.

3.
இரண கிரண மடமயில் ம்ருகமதம் புளகித இளமுலை இள-
நீர் தாங்கி *நுடங்கிய* நூல் போன்ற மருங்கினள்
இறுகிய சிறுபிறை எயிறு உடை எமபடர் எனது உயிர் கொள வரின்,
யான் ஏங்குதல் கண்டுஎதிர் தான் ஏன்றுகொளும் குயில்
*நுடங்கிய* - ஒல்குதல்,
தேவேந்திர சங்க வகுப்பு, திருப்புகழ்

பொன் நிறத்தவளாகி ஒளி வீசுபவளாகிய மயிலன்ன சாயலை உடையவள் கஸ்தூரி பூசியதும் புளகாங்கிதம் கொண்டதுமான இள நீரின் குரும்பை போன்ற யவ்வன மார்பை தாங்குவதால் ஓடிந்து விடுவது போல் காட்சி தரும் சிறிய நூல் போன்ற நுண் இடையினை உடையவள் இறுக்கி இருக்கும் பிறைச் சந்திரனைப் போன்ற பற்களை உடைய எம தூதர்கள் எனது உயிரை பறித்துப் போக வந்தால் நான் அப்போது அடையும் பெரும் துயரைக் கண்டு, என் எதிரில் தோன்றி, எனக்கு அபயம் அளித்து ஆட்கொண்டு அருளும் குயில் போன்றவள்.